عن المراكب والزحاليق

خلاصة الكلام يا جماعة...إن المركب بتتزحلق
و ليها زحاليق مخصوصة بيزحلقوها بيها (مش أى زحاليق طبعاB) )
و يوم زحلقة المركب ده بيبقى يوم عيييد...
و الناس كلها تتجمع و تتفرج و صاحب المركب ييجى و الناس الكبارة بقى و هيصة...
أمال...هوا كل يوم بنزحلق مركب
طب إزاى و فين وليه؟
...هوا ده موضوعنا
طب صلوا على النبى (عليه الصلاة و السلام)

المركب بتتبنى فى مكان بيسموه ترسانه

و جوة الترسانة بتتبنى فى حاجة من الأتنين :

1- حوض (سواء كان حوض عائم أو جاف)
- قزق (Slipway) (أو زحاليق زى ما سميناها
ألواح و عيدان المراكب بتتقطع و بتتلحم و بتتظبط و فى الآخر بتتركب علشان تكون بلوكات المركب (المركب بس
متقسمة حتت)

* و بعدين بيودوهم على القزق علشان يتجمعوا
* المركب بتكون محطوطة على عجل...و ده اللى بيخليهم يقدروا يحركوها من مكان للتانى
* و ممكن أكتر من مركب يكونوا فى نفس الترسانة فى نفس الوقت
* بالنسبة للزحلقة ففى طريقتين:

1- بالطول :

و فيها المركب بتنزل بضهرها (بمبدأ إدى ضهرك للترعة على رأى العالم الشهير محمود رضا)
2- بالعرض :

بتكون واقفة على الحرف و بعدين يسبوها تنزل و تعمل تششششششش كبيرة
و ده طبعا له حسابات كتير علشان تتأكد من سلامة المركب و هيا نازلة على الزحليقة B)

شوفوا هنا مثلا...
زحاليقوا
بيزحلقوا مركب جديدة فى البحرية الأمريكية ...و حصلت لخبطة فى الحسابات
و يا دوب يقولوا سيرى يا نورومااااااندى
و تششششششششششششششششششش
المفروض التششششششش اللى بتحصل تحصل من ناحية البحر و بس....مش من الناحية اللى واقفين فيها الناس
لكن فى حالتنا دى حصلت فى الناحيتين
و بالتالى الناس كلها إتغرقت و كان فيهم جنرالات و ناس جامدة
و بس كدة...دى قصة المركب و الزحاليق
صدق اللى قال....عالم زحاليق صحيح

عايز تعليقات على الفيديو و الكلام و الصور و كل حاجة
ماحدش يدخل يتفرج و يطلع من سكات
مش فاتحينها فاترينة هنا